دار المسنيــــن ( البيت الجديد ) ؟؟؟!!!!!

دار المسنيــــن ( البيت الجديد ) ؟؟؟!!!!!
شعر:زينات القليوبي


بتلم ليه.. الهدمتين والطرحتين والشبشبين ؟؟؟!!!

ماتقوللي ياابني واخدني فين؟؟؟

( علي بيت جديد ) ؟؟؟؟؟!!!!!!

مش عايزه ياابني بيت جديد...

البيت دهه أنا عشت فيه خمسين سنــــــــه

مااعرفش غيـــره أي بيت ؟؟؟

أنا جيت عروسه صغيره وقعدت فيه لمّ أتحنيت

أسأل بلاط الأرض ؟؟؟ وأسأل كـــــــل حيــط

مش عايزه غيره أي بيت ؟!!

أنا عشت ياابني سنين هنا ..

وأتمني أموت برضك هنـــــا

علي فرشتي .. ومخدتي .. والبطانيه واللحاف

أفتح عينيه كل يوم .. وأقفل عينيه كل يوم

( علي إيد أبوك بتضمني ف صورة الزفاف )

بتدفي قلبي وتحضنه ف سنيــــــــــن عجاف

وانا عارفه ياابني ان خدتني البيت الجديد

( أنا رايحه أخاف .. وانا ياابني مش عاوزه أخاف !!!)

ف الأوضه دي أنا لسّه عايشه ويّا أبوك

( عمري اللي فـــــات !!!)

( أصل الحبايب لوسابوك .. بيعيشوا فيك بالذكريات )

خليني ياابني ويّا أبوك أصحي وآبــات

وأعيش معاه باقي الساعات ...

واشم ريحته ف الحاجـــــــات

( مين اللي قالك .. إنه مــــــــــــــــــات؟!!)

لسّّّه البدل جوّه الدولاب .. جنب السرير أخر كتاب

ولسّّه سجادة الصــــــلاه..

والسبحة فوقها منـــوّره

( ولسّّّه بااسمع ضحكته وسط السكـــــــــــــات !!!)

أنا عايشه ياابني ..

بحاجة أبوك متونســــــــه

وبدخلتك ويّا العيال متونّسه

( وانا عارفه ياابني )

ان خدتني البيت الجديد

رايحه أتنســي .. وانا ياابني مش عاوزه أتنسي ؟!!

فإن كنت محتاج الوســـــع

لاجل العيــــــــــال ؟؟؟

هات العيـــــــــــــا ل

انا عندي ياابني سرير كبير

حاارقد علي حرف السريــــر

( واسيب لهم باقي السرير)

وان كنت محتاج السرير ؟؟؟

خد السريــــــــــــر!!!

(إن شالله أنام فوق الحصير )

لكن أنام وسط الأمـان !!!

خليني ياابني ف وسطهم ..

قدّرني (واحده ) منهــــم

باقي الزمان .. وماهوش كتير ؟؟؟

( وحياتك أنت ؟!! ..ماهوش كتير)

أنا مش حاأعيش أدّ اللي عيشته

( ولانفسي أعيش بعد اللي شفتــه ) ؟؟؟!!!

كمّّل جميلك .. !!!

( وأستر الباقي ف حياتي ) ؟؟؟!!!

أناعمري ياابني قصادعينيك ..

( فرّطت ف أمي أو حماتـي؟؟؟؟ )


( إن كان علي ضيق المكان )

ماانا قلتلك خد السريـــر !!!

( وإن كان علي ضيق المعيشه )

( أبوك سايبلي معاش كبيـــــــر )

قسمته يابني من زمان ( النص ليك )

و( الربع مصروف العيـــــــــال )

( والباقي مصروف الـــــدوا !!!)

لكن خــلاص
ـــــــــ

( وحياة عينيك ماعاد حايلزمني الدوا )


خد المعاش .. ؟؟؟؟؟؟؟

( كل المعـــــــــــــاش ) !!!!!!!!

لكن بــلاش ..

( ترميني ف البيت الجديد )

وأحس إن ربايتي فيك

( راحت .. بــــــــــــــــــــلاش )


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ـــــــــــــــــــــــــــــــــــــــ


صرخة نيابة عن كل أم وكل أب

في زمن الجحود والنكران ...


زينات القليوبي