حقي وحقك .... أشرف توفيق

موضوع: حقي وحقك .... أشرف توفيق 29/9/2009, 1:02 am

دي قصيدة اسمها حقي وحقك لشاعر اسمه أشرف توفيق
شوفوا بقى الراجل حقاني اد ايــــــــــــه

..كان زمان
..الحِلم كان واحد في قلبي
..إني احبِّكْ
..وامّا حبِّيتِك
..بقى الحِلم اللّي عندي ازّاي احبِّكْ
..داب خلاص الحبّ فينا
..وابتدِينا.. يبقى لِينا..فوق بحور الشوق سفينه
..بس لازم لجْل ما نكمِّل طريقنا تبقِي عارفـَه
..إن نار الحبّ دايماً عايشَه خايفـَه
واللّي هيخلّيها تطّمّن وتكبرْ
..لو ترقِّي
..وْتعرفي حقِّك... وحقِّي
تعرفي إيه يبقى حقِّك؟
..حقّك انيِّ ابقى لعيونِك ألف حارسْ
وابقى وقت الحب عاشق
..وابقى وقت الشدَّه فارسْ
..واعملِك جدول مُذاكرَه زيّ أطفال المدارسْ
وانّي احسّ القلب فاضي
..مهما شال من شوق وجابْ لِكْ
واجري والأشواق بتسبقني
..عشان اوصَل بسرعه.. بسرعه قبلِكْ
..حقِّك انِّ الدمع يفرَحْ
..ينتشِي
..يجنسىر
..يدوخْ
..ينزِل بسُرعَه لمّا اقابلِك
..حقّك اني انطق: "باحبّك" كلّ ثانيه
..وارسمِك في القلب دُنيا... دنيا تانيه
..أبقى انا بالحبّ سُورْها
..وانتي تبقِي هناك قَمَرْها
وانتي نورها
..وانتي نارها
..والنجوم سابحه فْ مَدَارها
..وانتي أحلامها وجَمالها
..وانتي وِدْيانها وجبالها
..والكُبار فيها وْعِيالها
دنيا فيها تكوني وحدِك... يبقَى مَالهْا؟
..حقّك اني اكتب في رمش العين قصايدْ
..وفْ سواد العين قصايدْ
..وفْ جمال الروح قصايدْ
حقّك اني اقرا فْ ملامحِك كلّ يوم ..زيّ الجرايدْ
حقّك اني استنىَّ قلبِك
يوم ومين شهرين سنه للعمر كلـُّه
واني اشِيل مِن شوقنا شوكنا
..وْتاخْدي بسّ الشوق وفُلـُّه
حقّك انّ القلب ينطق
!أحلى شيء في الحبّ ذُلُّه
..حقّك اني ابقَى لِك البحر الحنَيِّنْ
وابقَى لو شدّيتي هادي
..وابقَى لو هدّيتي ليّنْ
..حتى لو مرَّه اتعاتبِنْا..في العتاب تلِْقيني هيّنْ
..وادفِن الجرح فْ كياني..مهما كان في عْينَيَّه بيِّنْ
حقّك اني اعمِل لِك انتي كُرسي فوق الشمس
..واعمل بينكو طاقَه
لمّا نور الشمس يضعف
..نورك انتي يْجيب لُه طاقَه
حقّك اني اقفل بيبانِك عن قلوب الخلق
..وادخُل لك بقلبي يكون بِطَاقَه
..حقّك انّي اسمع واسامِحْ
..حقّك انّي ازعَل واصالِحْ
وان قلبي يكون ديوان مُلْكِكْ
ما يدخلهوش في مرّه... وبْأوامرِكْ
..إلاّ أصحاب المصالحْ
..حقّك انيّ اهزمْ ظروفِكْ
..حقّك انىّ امنع خسوفِكْ
..وانيّ اشيل بالحب خوفِكْ
..أمَّا حقِّي يا حبيبتي
...حَقِّي إنـِّي
!!!إنـِّي اشوفـِكْ

موضوع: رد: حقي وحقك .... أشرف توفيق 1/10/2009, 8:59 am

راجل حقانى اوى !!!!!

» ألبوم إيهاب توفيق :: لازم تسمع 2009